ឧត្តរមានជ័យ-មណ្ឌលគិរី៖ នៅព្រឹកថ្ងៃទី១ នៃការប្រឡងសញ្ញបត្រមធ្យមសិក្សាទុតិយភូមិឆ្នាំ២០២២ នេះ នៅតាមមណ្ឌលប្រឡងនីមួយៗមានសកម្មភាពមមាញឹកដោយការប្រឡងរបស់បេក្ខជន ប្រកបដោយភាពរលូនតាមផែនការគ្រោងទុក ព្រមទាំងមានការចូលរួមយ៉ាងជិតស្និទពីសំណាក់មន្រ្តីអង្កេតការណ៍នៃអង្គភាពប្រឆាំងអំពើពុករលួយ និងសម្របសម្រួលដោយមន្រ្តី យុវជន ស.ស.យ.ក កម្លាំងសមត្ថកិច្ច និងផ្នែកពាក់ព័ន្ធ។
អ្វីដែលគួរឱ្យចាប់អារម្មណ៍នៅព្រឹកនេះគឺមានការចែកចាយនូវព័ត៌មានពាក់ព័ន្ធនឹងការចូលរួមប្រឡងដោយមានបញ្ហាសុខភាពរបស់បេក្ខជន ០២ រូប ដែលទទួលបានការសម្របសម្រួល និងអនុញ្ញាតពីសំណាក់ប្រធានមណ្ឌលប្រឡងរបស់បេក្ខជនទាំងពីរ។
ក្នុងនោះបេក្ខជនមួយរូបនៅខេត្តមណ្ឌលគិរី ដែលប្រឡងនៅមណ្ឌលវិទ្យាល័យ ហ៊ុន សែន មណ្ឌលគិរី (ត្បូង) ត្រូវបានប្រធានមណ្ឌលអនុញ្ញាតឱ្យប្រឡងនៅបន្ទប់ដាច់ដោយឡែក ក្រោយបេក្ខជនរូបនេះទើបតែវះកាត់ពោះវៀនដុះខ្នែងរួច។ ដោយឡែក នៅខេត្តឧត្តរមានជ័យក៏មានបេក្ខនារីមួយរូបត្រូវបានប្រធានមណ្ឌលអនុញ្ញាតឱ្យប្រឡងនៅបន្ទប់ដាច់ដោយឡែកផងដែរ បន្ទាប់ពីរកឃើញថាយុវតីខាងលើមានវិជ្ជមានកូវីដ-១៩។ បេក្ខនារីខាងលើមានឈ្មោះ វ៉ាន់ សុខឿន ប្រឡងនៅមណ្ឌលវិទ្យាល័យ ហ៊ុន សែន ឧត្តរមានជ័យ។ ក្រៅពីនេះក៏មានបេក្ខជន បេក្ខនារីមួយចំនួន មានបញ្ហាសុខភាពបន្តិចបន្តួច ប៉ុន្តែត្រូវបានក្រុមគ្រូពេទ្យជួយសម្រួល និងបានប្រឡងជាធម្មតាឡើងវិញ។
គួរបញ្ជាក់ថា សម័យប្រឡងមធ្យមសិក្សាទុតិយភូមិ ឆ្នាំ២០២២ នេះ ធ្វើឡើងរយៈពេល ២ថ្ងៃគឺថ្ងៃទី០៥ និងថ្ងៃទី០៦ ខែធ្នូ ឆ្នាំ២០២២ ដោយមានបេក្ខជនចូលរួមប្រឡងប្រមាណជា ១៣ម៉ឺននាក់៕
